Seinastu vikurnar hevur ein hitabylgja herjað í londunum í bæði suðurpartinum og landsynningspartinum av Asia, har fleiri hitamett eru sett, eitt nú í Tailandi og Bangladesj.
Í Vietnam var hitin fyrr í vikuni mátaður at vera 44 hitastig í tveimum býum, sum er tætt at hitametinum í Vietnam, ið er 44,2 hitastig.
Ógvisligur hiti og mangul á svalandi regn hevur ført til, at fólk hava latið lív og skúlar eru afturlatnir bæði á Filipsoyggjunum og í India. Serfrøðingar vísa á, at slíkar veðurlagsbroytingar eru ábending um longri, sterkari og vandamiklari hitabylgjur.
Tøl frá veðurstøðini í Vietnam vísa, at landið var rakt av sterkum hitabylgjum tríggjar ferðir í apríl mánaða.
Eitt hitt mest dramatiska tekinið var í sunnanverta landslutinum Dong Nai, har hundraðtúsundtals av deyðum fiski lá og rak í 300 stóra hektar vatnbrunninum Song May, so at vatnið næstan ikki sást undir fiskateppinum.
