Tað er nú greitt, at Lionel Messi verður PSG spælari hetta kappingarárið.
Tað váttar Guillem Balague, ítróttarskrivari hjá BBC.
Sambært BBC hevur Messi skrivað undir tvey ára sáttmála við franska høvuðsstaðarfelagið, eftir at hann brádliga fór úr Barcelona fyrr í summar.
34 ára gamli Messi fór frá Barcelona, eftir at tað ikki eydnaðist spanska felagnum at fáa nýggjan sáttmála við hann – sum skilst orsakað av nýggjum fair play reglum í sponsku meistarakappingini.
Messi gjørdist partur av Barcelona hópinum í 2000, og hann hevur sostatt spælt alla sína vaksnu yrkisleið sum Barcelona spælari. Messi hevur skotið 672 mál í 778 dystum fyri Barcelona, hann hevur vunnið Ballon d’Or seks ferðir, og hann hevur vunnið 35 steyp við felagnum.
Nú skiftið til PSG er váttað, er eisini greitt, at Messi fer at spæla við fyrrverandi liðfelaganum, Neymar, sum saman við Kylian Mbappe eru dýrastu leikarar í heiminum.
PSG endaði farna kappingarár á øðrum plássi í fronsku deildini, eitt stig aftan fyri Lille.
