Leysasøgurnar hava gingið í fleiri ár, og seinastu mánaðirnir hevur tað verið størsta opna loyndarmál í fótbóltsheiminum. Í gjárkvøldið váttaði Real Madrid tíðindini. Kylian Mbappé, liðskipari á franska landsliðnum, og ein av heimsins bestu leikarum, skiftir til spanska stórfelagið.
- Real Madrid CF og Kylian Mbappé hava gjørt eina avtalu fyri tey komandi fimm kappingarárini, skriva Real Madrid stutt á heimasíðuni hjá felagnum.
Kylian Mbappé, sum er 25-ára gamal, hevur seinastu sjey kappingarárini spælt við Paris Saint-Germain. Her hevur hann vunnið alt, uttan tað stóra steypið, sum Real Madrid júst hevur vunnið, nevniliga Champions League steypið.
Franska superstjørnan hevur skotið 256 mál í 308 dystum fyri franska felagið. Í landsliðshøpi hevur hann skotið 46 mál í 77 dystum. Í 2018 vann hann heimsmeistaraheitið við Fraklandi. Hann og liðfelagarnir vóru um reppi at endurtaka bragdið í 2022, men máttu lúta fyri Argentina og Messi eftir brotssparkkapping í finaluni.
Sáttmálin millum Mbappé og PSG gongur út 30. juni, og kann hann tí skifta frítt til Real Madrid. Men áðrenn franskmaðurin flytur til spanska høvuðsstaðin, skal hann spæla EM við Fraklandi. EM byrjar 14. juni.
