Fyri viku síðani frættist, at ein møgulig søla av Magn var í umbúna av íslendska eigaranum, Skeljungur. Nú avsannar felagið hesi tíðindi.
- Tíðindini um, ið RÚV bar fram, at dótturfelagið hjá Skeljungur, P/F Magn, er í holt við at verða selt, eru ikki sonn, sigur íslendska oljufelagið í stuttari fráboðan í gjár, sum heimasíðan hjá Morgunblaðnum endurgevur.
Í fráboðanini stendur víðari, har tað verður víst til tíðindi hjá RÚV um, at sølan er partur av einari tilgongd hjá Skeljungur at umskipa seg. Men sambært felagnum, so er hetta heldur ikki satt, tí tað eru ikki tikin nøkur stig til at gera nakrar broytingar við felagnum.
Í einari samrøðu við ViðskiptaMoggan (Vinnublaðið hjá Morgunblaðnum, red.) fyrr í mánaðinum segði Jón Ásgeir Jóhannesson, nevndarformaðurin í Skeljungur, at ein søla av dótturfelagnum í Føroyum var ein møguleiki, har komið varð inn á, at felagið møguliga heldur ætlaði at gera íløgur í Stórabretlandi í staðin. Kortini er tó eingin avgerð tikin hesum viðvíkjandi, sigur íslendska felagið.
Tað er íslendska oljufelagið, Skeljungur, ið eigur allan partapeningin í P/F Magn.
.png){kind=logo}