(Mynd: Skíggjamynd/kvf.fo)
Lutakastið verður í kvøld
Í 3-2 í sjónvarpinum í kvøld fer greiða at fáast á, hvussu spælast skal í undanumfarinum og 1. umfari í kappingini um Løgmanssteypið
Sigurjón Einarsson
28. mars 2022 kl. 13:13
Sunnudagin 3. apríl verður sjøtul settur á kappingina um Løgmanssteypið 2022. Fyrst á skránni eru dystirnir í undanumfarinum, og smáar tvær vikur seinni, hósdagin 14. apríl, sum er skírishósdagur, verður 1. umfar í kappingini spælt.
Lutakast um, hvussu spælast skal í undanumfarinum og 1. umfari verður í 3-2 í sjónvarpinum í kvøld (mánadagin 28. mars, red.), sum byrjar beint eftir Dag og Viku.
Liðini í undanumfarinum eru FC Hoyvík, FC Suðuroy, MB og Royn.
Finalan í fjør var millum B36 og NSÍ. Eftir 90 minuttir stóð á jøvnum 1-1, og tí mátti longd leiktíð og brotssparkskapping til, áðrenn B36, sum dróg longra stráðið í brotssparkskappingini, kundi taka ímóti Løgmanssteypinum.
Kelda: Hans Erik Danielsen/fsf.fo
