Í dag vitjaðu løgtingslimir úr flestu politisku flokkunum Heilsuhjálparafelag Føroya. Felagið hevði boðið teimum til ein fund um løn undir útbúgving, eitt mál sum felagið hevur arbeitt við í yvir 6 ár, men sum nú er um at vera koyrt ígjøgnum uttan at okkara limir verða tiknir við.
Heilsuhjálparafelag Føroya reisti spurningin fyrstu ferð, á fundi við Anniku Olsen og Jógvan Skorheim táverandi borgarstjórar í Tórshavnar- og Klaksvík kommunum og táverandi landsstýrismann, Jenis av Rana.
Síðani hevur Heilsuhjálparafelagið arbeitt miðvíst við málinum og verið á nógvum fundum við politiska myndugleikan hesum viðvíkjandi. Úrslitið var, at málið kom í samgonguskjalið, og nakrar milliónir vórðu játtaðar á fíggjarlógini.
Ein arbeiðsbólkur uttanum Heilsuhjálparafelagið kom til ta niðurstøðu, at tørvurin er størstur á fleiri útbúnum heilsurøktarum, orsakað av, at kompleksiteturin í heilsurøktini er øktur sera nógv seinnu árini - heldur enn fleiri heilsuhjálparum.
Á einum øki har heilsuhjálparar eru nógv størsti fakbólkur, er hetta ein undrunarverd niðurstøða, serliga tá mest sum allir heilsurøktarar hava verið ígjøgnum eina útbúgving sum heilsuhjálparar.
Eingin ivi er um, at heilsurøktarar somuleiðis hava tørv á løn undir útbúgving. Men tørvurin á heilsuhjálparum er enn meira átrokandi á einum øki, har alsamt fleiri eldri hava tørv á heilsuhjálp.
Avbjóðingin við at fáa ófaklærd at útbúgva seg sum heilsuhjálpara er bæði konkret og átrokandi, og tí var tað sera jaligt at fáa politiska myndugleikan í talu.
Mary Antonsdóttir, forkvinna
Heilsuhjálparafelag Føroya
