Týsdagin 8. februar letur Listasavnið upp aftur við nýggjum serframsýningum. Savnið hevur verið stongt vegna umvæling, men nú er listin komin upp aftur at hanga í føstu framsýningini. Eisini lata tvær nýggjar serframsýningar upp í vikuni.
Listasavnið fekk eina stórsligna gávu við átta málningum eftir Sámal Joensen-Mikines frá einum privatum eigara í Danmark stutt fyri jól. Teir átta málningarnir kunnu nú upplivast saman í einum rúmi fyri seg. Málningarnir kunnu síggjast frá 8. februar.
Fríggjadagin 11. februar klokkan 16-18 letur nýggja serframsýningin Landslagið í broyting upp. Fernisering við røðum og tónleiki verður á skránni og savnið bjóðar ábit. Framsýningin varpar ljós á broytingar bæði í náttúruni og listini og kannar, á hvønn hátt samtíðarlistin endurspeglar broytingarnar í føroyska samfelagnum og náttúruni. Øll eru hjartaliga vælkomin.
Barnafamiljur eru vælkomnar at seta seg við barnaborðini í forhøllini at loysa ymiskar kreativar uppgávur. Tað er ókeypis at vitja forhøllina og børn og ung undir 20 ár sleppa ókeypis inn á savnið.
Listasavn Føroya er opið týsdag til sunnudag klokkan 13-16.
Les meira um framsýningarnar á www.art.fo.
