Enskir miðlar skrivaðu í gjárkvøldið um eitt løgreglumál, har ein Premier League-leikari varð handtikin av løgregluni fríggjadagin vegna misbrot móti einum barni.
Samstundis sum hetta kom fram, kom Everton við eini fráboðan á heimasíðu sínari, at felagið hevur fyribils bráðfeingis loyst ein fyrsta liðsleikara úr starvi, meðan kanningarnar hjá løgregluni fara fram, og at felagið ikki hevur fleiri viðmerkingar til málið í løtuni.
Viðkomandi leikarin varð handtikin av løgregluni í Stór-Manchester fríggjadagin, men er blivin leyslatin aftur móti veðhaldi.
Daily Mail skrivar, at leikarin er 31-ára gamal og giftur.
Aðrir enskir miðlar skriva, at leikarin er ein royndur landsliðsleikari og er vanliga at finna í byrjunaruppstillingini fyri lið sítt í Premier League. Miðlanir nevna tó ikki, hvat fyri leikara talan er um vegna løgfrøðiligar orsøkir.
