Leiðarin í Kekenia, Ramsan Kadyrov, hevur boðað frá, at innan stutta tíð verða tannáringasynir hansara sendir til Ukraina, har teir skulu stríðast á frontinum saman við russiskum deildum.
Synir Kadyrovs eru 14, 15 og 16 ára gamlir.
Kadyrov og stýrið í Kekenia er stinnur sameindur hjá Russlandi og hevur stuðlað innrásini í Ukraina bæði Tjetjenienhugsjónarliga og hernaðarliga.
Sambært BBC sigur Kadyrov á sosialum miðlum, at ein pápi skal læra synir sínar at verja familju, fólk og faðirland, og at synir hansara eru langt síðani byrjaðir upp á sína hernaðarligu venjing.
Pápi Ramsan Kadyrov, Akhmad Kadyrov, gjørdist forseti í Kekenia í 2003, eftir at hann skifti síðu í krígnum í Kekenia og gav Vladimir Putin sín stuðul. Akhmad Kadyrov varð myrdur í 2004, og trý ár seinni, í 2007, tók Ramsan Kadyrov við sum leiðari í Kekenia, eftir at Putin koyrdi táverandi leiðaran, Alu Alkhanov, frá.
Kadyrov hevur gjørt sær eina ímynd av einum stríðssinaðum leiðara, ið er stinnur stuðul hjá Putin, og sum heldur lítið um Vesturheimin. Eisini hevur Kadyrov lagt sjónbond út av synum sínum, har teir royna seg við skotvápnum.
Altjóða dómstólurin metir tað vera krígsbrotsverk at brúka børn undir 15 ára aldur í vápnaðum stríði, men Russland hevur ikki viðurkend altjóða dómstólin.
