Landsliðið í sjónvarpinum í dag
Føroyar spæla ímóti einum av stinnastu hondbóltstjóðunum yvirhøvur, tá ið kvinnurnar fara at spæla ímóti Svøríki
Hondbóltssamband Føroya
12. oktober 2023 kl. 10:10
Føroyar hava ongantíð vunnið á mótstøðuliðunum, sum bíða í EM-undankappingardystunum hósdagin og sunnudagin.
Í dag, hósdagin kl. 17.30, møta okkara kvinnur hondbóltsrisanum Svøríki.
Føroyar hava leikt tvær ferðir móti Svøríki áður. Tað var í EM-undankappingini til EM20, og tá gjørdist talan um tvey stórtap. Kringvarpið vísir dystin í dag í sjónvarpinum.
Sunnudagin kl. 15.00, í Høllini á Hálsi, møta Føroyar Íslandi. Ísland vann í gjár fyrsta dystin í bólkaspælinum 32-14 á heimavølli móti Luksemborg.
Føroyar hava møtt Íslandi 5 ferðir áður, men hava ongantíð vunnið.
Ísland var á vitjan í Føroyum í 2022, tá tveir venjingardystir vóru leiktir. Ísland vann báðar dystirnar við 5 málum. Ísland vann seg ikki í seinasta EM-endaspælið.
