Í gjár varð ringt til løgregluna at boða frá, at ein kvinna varð blivin rakt av einum bili. Hetta var í Porkeri og kvinnan kom gangandi fram við vegnum við barnavogni, tá ið hon varð rakt av einum bili, sum kom koyrandi framvið.

Løgreglan sigur, at tíbetur koyrdi bilurin øgiliga spakuliga, so stoyturin varð lítil. Einki hendi við barnavogninum, men kvinnan varð sligin um koll og skurðslaði knø og albogar, tí ið hon tók í vegin.

Hon varð koyrd á Suðuroyar Sjúkrahús til kanningar, men har varð staðfest, at hon hevði ikki fingið aðrar skaðar enn nøkur skurðsl.

Løgreglan sigur, at frágreiðing verður skrivað um óhappið og so verður støða tikin til um farið verður víðari við tí.