Leygardagin fekk Krígssavnið í Vágum handað skjalasavnið hjá Niels Juel Arge, sála.
Hetta savnið er grundarlagið undir dygdar bókaverki hansara í seks bindum, “Stríðsárini 1940-45”, sum kom út seinast í 1980-árunum.
Tað er einkjan, Petra, og eftirkomarar teirra, sum hava tikið ta støðu, at skjalasavnið skal verða ogn hjá Krígssavninum.
Krígssavnið sigur seg fegnast um gávuna, sum verður hent í arbeiðnum hjá savninum og tøk hjá øllum, sum vilja granska í hesum týdningarmikla tíðarskeiði, sum seinni heimsbardagi er í Føroya søgu.
Dagbókin frá apríl 1940
Niels Juel Arge skrivaði dagbók um hendingarnar í 1940, og hendan dagbókin var ein uppistøða til útgávuna av flaggsøguni, sum kom út í 1980.
Eftir tað fór hann undir bókarøðina um stríðsárini, sum kom út árini 1985-90. Eisini hendan røðin hevði uppruna í dagbókini frá 1940.
Fakta:
Tað var hin 1. apríl 2008, at fyrsti fundur at stovnað Krígssavnið varð hildin. Tað vóru Felagið Vágar og Vága Kunningarstova, sum tóku stig til fundin.
Umboð fyri ferðavinnuna í Vágum, kommunurnar, Lions Club og bygdasøvnini í Vágum vóru eisini við á tí fundinum.
Tann 22. mai 2018 varð fyrsta byggistig av arbeiðnum at gera gamla SOR-bygningin til Krígssavn, handað.
Í summar, frá 1. mai til 30. september 2021 verður Krígssavnið opið í vikuskiftunum: Leygardag og sunnudag frá klokkan 14 – 17.
Aðrar tíðir ber til at vitja savnið eftir avtalu – ring tlf. 221940