Kongshjúnini koma til Føroya á almenna vitjan í døgunum 11. til 13. juni. Tað boðar Aksel V. Johannesen, løgmaður frá í tíðindaskrivi í dag.

 Hetta er fyrsta vitjanin hjá Fríðriki kongi og Mary drotning í Føroyum, síðan tey tóku við trónuni. Aksel V. Johannesen, løgmaður, er vertur fyri vitjanini.

Tey skuldu annars koma til Føroya í juni í fjør, men tann vitjanin varð avlýst tí arbeiðarafeløgini vóru í verkfalli og tað ávirkaði samfelagið so illa, at tað varð metta at vera ráðiligast bara at avlýsa.

Nú verður vitjanin so aftur, akkurát eitt ár seinkað, tí dagarnir eru teir somu, og støðini, tey skulu vitja, eru tey somu.

– Skráin er bæði umfatandi og fjølbroytt, og tí kunnu kongshjúnini gleða seg til nakrar spennandi dagar í Føroyum, sigur Aksel V. Johannesen, løgmaður.

Á Føroyaferðini fara kongshjúnini at vitja í Havn, umframt í Suðuroy og á Eiði.

Í Suðuroynni vitja tey í Vági, í Fámjin og á Tvøroyri.

Hjúnini sleppa at uppliva føroyska mentan, náttúru og at heilsa upp á føroyingar í øllum aldri.