Heilsutrygd hevur nú søkt eftir tilsamans sjey kommunulæknum kring landið. Í hesum sambandi verður eisini søkt eftir tveimum læknum til viðtaluna á Tvøroyri.
Har eru tvey størv og í mars í fjør varð Davið Guðnason settur í fast starv har, og so varð hitt starvið røkt við avloysarum.
Men hann fór í farloyvi um ársskiftið í eitt hálvt ár. Sostatt flytur hann nú suðuraftur - men hann hevur søkt um at verða fluttur til Vágs, so tá ið hann byrjar aftur tann 1. juni, verður tað í Heilsumiðstøðini í Vági.
Í Vági eru eisini tvey størv, men har hevur Dorrit Bech Joensen verið einsamøll í starvi í langsamiliga tíð.
Nú Dávið Gudnason eisini verður settur í starv í Vági, verða tveir kommunulæknar í føstum starvi á Heilsumiðstøðini í Vági.
Síðani hann fór í farloyvi, hava størvini á Tvøroyri verið røkt av avloysarum. Tey hava havt eitt rættiliga støðugt lið av avloysarum og tað merkir, at í stóran mun eru tað teir somu avloysararnir, sum skiftast um at koma aftur.
Men endamálið er at at fáa tveir læknar í fast starv á Tvøroyri og tí verður nú søkt eftir tveimum læknum til viðtaluna á Tvøroyri.
Í aðrari viðtaluni á Tvøroyri eru umleið 1.170 fólk og í hinari viðtaluni eru umleið 1.420 fólk.
Ein læknaskrivari er í starvi í aðrari viðtaluni og í hinari viðtaluni er ein sjúkrarøktarfrøðingur og ein læknaskrivari í starvi.
Tilsamans eru umleið 4.570 í Suðuroyar læknadømi, og nú eru tveir læknar í føstum starvi - og teir eru báðir í Vági.
Í aðrari viðtaluni í Vági er ein heilsurøktari, sum eisini er læknaskrivari, og í hinari viðtaluni er eisini ein heilsurøktari, sum eisini er læknaskrivari. Í Heilsumiðstøðini í Vági arbeiðir somuleiðis ein sjúkrarøktarfrøðingur sum eisini hevur ískoytisútbúgving í diabetis og í at røkta sár.
