Í kvøld skal kreppurakta Liverpool spæla returdyst í móti Wolverhampton um eitt pláss í fjórðu rundini í Fa Cup. Fyrri dysturin endaði við javnleiki 2-2.
Í tíðindafundinum í gjár fekk Liverpool venjarin, Jürgen Klopp, ikki óvæntað fleiri spurningar um flytingargluggan, sum letur aftur á midnátt 31 januar.
Klopp váttaði fyri tíðindafólkunum, at Liverpool hyggur at nýggjum leikarum.
- Vit hyggja eisini eftir leikarum uttanfyri liðið. Vit satsa ikki uppá hendan hópin til 2050, svaraði týskarin um møgulig keyp í hesum mánaðinum.
Liverpool spælur sum áður nevnt í kvøld á útivølli í móti Wolverhampton. Eftir fleiri vánalig úrslit í 2023, snúði spurningarnir hjá tíðindafólkunum í nógv størri mun um manglandi leikarakeyp, enn um komandi dystin.
- Um loysnin hjá okkum er uttanfyri núverandi hópin, og møguleikin er til staðar, so ynskja vit sjálvandi at heinta nýggjar leikarar sum styrkja um liðið.
- Vit hava eina rúgvu av spælarum sum hava sáttmála her, men teir eru skaddir í løtuni. Knýta vit fleiri spælarar at hópinum nú, so fáa vit ein trupulleika tá hinir verða til reiðar aftur.
Liverpool venjarin er kendur fyri altíð at verja sínar leikarar. Tíðindafundurin í gjár var onki undantak.
- Hópurin hjá okkum er ikki ov smælur. Ja vit mugu styrkja okkum, eins og øll onnur, men er hetta rætta løtan? Tað dugi eg ikki at síggja.
