KÍ tapti fyrsta dystin á venjingarleguni í Portugal. Mótstøðuliðið var Beijing Guoan, sum vann 1-0. Málið varð skorað longu, tá ið fimm minuttir vóru farnir.
Hagtølini frá dystinum siga, at tað gekk rættiliga javnt fyri seg.
KÍ ferðalagið fór av landinum tíðliga í gjár, og tað var ikki fyrr enn seint í gjárkvøldið, at ferðalagið var á gistingarhúsinum í Algarve í Portugal.
Teir fyrstu ellivu í dag vóru Ari í Haraldstovu Petersen – Jóannes K. Danielsen, Børge Petersen, Jákup N. Vilhelmsen, Patrick da Silva – Deni Pavlovic, Dan í Soylu, Mads Bo Mikkelsen – Árni Frederiksberg, Páll A. Klettskarð, Claes Philip Kronberg.
Jákup B. Andreasen var millum teir, sum varð skiftur inn í dag. Onkrir spælarar hava skaðar at dragast við, og tí vóru teir ikki á vøllinum í dag. Millum hesar eru Odmar Færø og Heini Vatnsdal. René Shaki Joensen er ikki við á venjingarleguni. Hann lærir til elektrikara og er upptikin av at gera sveinastykki.
Næsti dysturin á venjingarleguni í Algarve í Portugal verður týsdagin, tá ið mótstøðuliðið verður Silkeborg IF, sum er á sætta plássi í superliguni.
