Fleiri hava kanska varnast fleiri bingjur, sum eru settar saman til ein runding uttan fyri Sjósavnið.
Ætlanin hjá Sjósavninum er, at livandi hemarar skulu svimja í karinum.
Í løtuni verður ein glasrútur settur í seinastu bingjuna. Og tá ið hon er sett uppá pláss, verður ein dúkur sveisaður innaní.
Ætlanin er, at fyrsti hemarin verður sleptur í karið í komandi mánað. Hetta verður samstundis fyrstu ferð – og einasta stað í heiminum – at hemari svimur í einum kari á landi, skrivar Tórshavnar kommuna á heimasíðu sínari.
Men ætlanin hjá Sjósavninum, at lata livandi hemarar svimja í karinum, møtir nú mótstøðu, tí inni á Facebook-síðuni hjá Tórshavnar kommunu geva fólk ilt av sær um ætlanina.
Hetta er nakað av tí, sum skrivað verður á Facebook-síðuni:
“Passar hatta? At halda djór í fangaskapi, so vit kunnu stuttleika okkum vid tí, hoyrir til undanfarnu øld
Hví ikki lata hemararnar heldur svimja í sjónum, har teir eiga at svimja?
Hví gera tit hatta?! Hemarin hoyrir ikki heima í fangaskapi!
Eg hugsi, at hemarar hoyra heima í sjónum, og ikki í einari karið (líkamikið hvussu stórt tað er)”.
Tað er David Geyti, sonur Bjørka Geyti, leiðara á Sjósavninum, sum eigur hugskotið at gera stóra karið til hemarar.
Karið er eitt frumsnið, og verður Sjósavnið umbygt og útbygt, er ætlanin, at eitt líknandi kar verður í savninum.
Hemarin fer at svimja í 650 tonsum av sjógvi. Gólvmálið í karinum er 314 fermetrar, skrivar Tórshavnar kommuna.