Kamala Harris hevur valt sítt varaforsetavalevni

Tað verður 60 ára gamli guvernørurin frá Minnesota, Tim Walz, sum fer at standa á atkvøðulepanum saman við Kamalu Harris á amerikanska forsetavalinum í november.

Tað skriva m.a CNN og The Washington Post. Harris hevur ikki sjálv váttað tíðindini.

Tim Walz kemur upprunaliga frá Nebraska og hevur eina fortíð sum skúlalærari. Hann hevur verið guvernørur í Minnesota síðan 2019.

Væntandi verður Tim Walz alment útnevndur til demokratiska varaforsetavalevnið á veljarafundi í Philadelphia í kvøld, sum verður startskotið til eina fimm daga langa turné gjøgnum sjey svingstatir.