Landsstýrismaðurin við fíggjarmálum hevur biðið Bárð á Steig Nielsen, løgmann, loysa seg úr starvi sum landsstýrismaður.

Orsøkin er, at hann er tikin fyri at koyra ávirkaður av rúsdrekka.

Tað váttar landsstýrismaðurin sjálvur í stuttari viðmerking til VP, har hann eisini biður Føroya fólki um umbering fyri mistakið.

Í viðmerkingini sigur hann, at hann hevði drukkið kvøldið fyri, og at hann óumhugsin var farin í bilin, tí hann skuldi at keypa morgunbreyð.

- Varð steðgaður av løgregluni, sum bað meg blása og vísti mær so at har stóð “positiv”, sigur nú skjótt fyrrverandi landsstýrismaðurin við VP.fo.

Dimmalætting hevur frá væl vitandi keldum frætt, at tað var seint í síðstu viku, at landsstýrismaðurin varð steðgaður av løgregluni. Hann varð steðgaður av løgregluni í Suðuroy, og tá vísti kanningin, at hann hevði ov nógv. Kortini hevur hann ikki valt at leggja frá sær fyrr enn í dag, og sum Dimmalætting skilir hevur flokkurin ikki fingið at vita um hendingina fyrr enn í dag.

Dimmalætting hevur eisini frætt, at kanningin av landsstýrismanninum vísti eina promillu uppá 1,26, og tá er hann farin um tað markið sum eitur rúsdrekkakoyring, og halda hesi tølini, so stendur hann til at missa koyrikortið.

Nú Jørgen Niclasen leggur frá sær, kann hann fara aftur í Løgtingið.

Tá hendir tað, at hann fær immunitet, og hendir tað, at hann skal í rættin, tí hann hevur ov høga promillu, so skal Løgtingið atkvøða um at taka immunitetin frá honum. Hann kann tó eisini velja at viðganga seg sekan, og tá nýtist tingið ikki at taka órinið frá honum.