Kappróðrarárið í ár hjá Tindi var tað fyrsta árið við venjara í felagnum, og felagið hevur avgjørt at halda fram við góða samstarvinum við John Reid.
Formaðurin í felagnum, John Høgnesen, vónar, at góða gongdin heldur fram.
- Málið fyri komandi ár er tað sama sum undanfarna ár. Málið er at vera við í kappingini, og at onkur bátur fer at kappast í toppinum. Á ársins róðrargalla fekk felagið heiðurin Ársins felag, og tað vísir, at vit hava nakað at byggja upp á, sigur formaðurin við Dimmalætting.
Hóast felagið bleiv ársins felag í ár, so vónar formaðurin, at felagið skjótt kann fáa betri umstøður til rógvararnar.
- Okkara ynski er at hava eitt neyst, har alt virksemi í felagnum kann vera samlað, tí sum nú er, ferðast vit millum bygdir. Eisini vænta vit, at vit fara at hava enn fleiri manningar komandi ár enn í ár, sigur John Høgnesen.
Ungt felag
Hóast kappróðrarfelagið Tindur ikki hevur so nógv ár á baki, so hevur undirtøkan fyri kappróðri í umhvørvinum verið góð, tí nógvar manningar hava luttikið í kappróðri seinastu árini. Í ár vóru níggju bátar fullmannaðir, og felagið megnaði í høvuðsheitum tað, ið tað hevði sett sær fyri. Millum annað endaðu 5-mannafør kvinnur umborð á Leikalind á einum øðrum plássi í FM stríðnum, og dreingirnir umborð á Knúki og Geytanum endaðu ávikavist nummar trý og fýra.
Felagið eigur fimm bátar, sum allir vóru mannaðir í ár. Manningarnar hava innivenjingar í Leirvík, har rógvimaskinur og amboð til styrkivenjing eru, og tá ið venjingarnar eru í bátinum, verður róð á Gøtuvík.
