Í fjør var Jóhan Josephsen 14 ferðir á næstbesta KÍ liðnum. Átta ferðir varð hann skiftur inn, og fýra ferðir varð hann skiftur út.
Næstsíðsta hósdag, tá ið KÍ vann 1-0 á útivølli ímóti HB, var 17 ára gamli Jóhan Josephsen fyrstu ferð málskjútti í næstbestu deildini, og í dag gjørdi hann av álvara um seg. KÍ vann 4-1 á heimavølli ímóti teimum næstbestu hjá B68, og Jóhan Josephsen skoraði trý tey fyrstu málini – til 1-0 og 2-0 í fyrra hálvleiki og til 3-0 tá ið ein tími var farin.
Fyrsta málið skoraði hann long í 6. minutti. Tá ið hann økti til 2-0 var tað eftir mistak í verjuni, at Jóhan fangaði bóltin og sneiddi framvið málverjanum, og 3-0 málið skoraði hann við brotssparki, sum hann sjálvur vann.
Óli Olsen minkaði um munin til 3-1 við rimmar langskoti. Bólturin fór út um og upp um málverjan og í málhorni. Heðin Klakstein, sum varð skiftur inn eftir steðgin, staðfesti í síðsta minutti 4-1 heimasigurin, tá ið hann var fyrstur á, eftir at bólturin hevði tikið í stólpan. Heðin sendi bóltin í málið umvegis bæði mótstøðumann og stólpan.
Eftir fimm umfør er KÍ saman við Skála topplið við 12 stigum. Flaggdagin verður toppdystur, tá Skála fær vitjan av KÍ.
B68 er á sættaplássið við 7 stigum. Flaggdagin fer B68 at spæla á Sandi.
