Hákun aftur sannførandi
Skanderborg Århus Håndbold var á vitjan hjá botnliðnum HC Midtjylland leygardagin. Fyri at hanga við kappingini um eitt pláss í endaspælinum mátti liðið hjá Hákuni vinna. Dysturin var tættur leingi, men seinastu fimm minuttirnar fall avgerðin.
Hákun West av Teigum var aftur sannførandi, og skoraði fýra mál, upp á fýra møguleikar.
Tað hevur verið tosað nógv um Hákun seinastu vikurnar í samband við at skifti hansara til bestu týsku deildina bleiv alment. Hann verður, av serfrøðingum, skýrdur at verða millum bestu leikarar á hansara plássið í deildini. Hann vísti aftur í dag, at hann er álitið tá hann fær bóltin á vonginum.
Komandi felagið hjá honum, Füchse Berlin, stendur í eini truplari støðu nú. Svenski Valter Crintz, sum eisini er høgri vongur, sleit krossbandi fyri eini viku síðan. Tað merkir at hann er skaddur í umleið eitt ár. Enn er óvist hvør fer at røkja plássið saman við Hákuni komandi kappingarár, inntil sviin er klárur aftur.
Eftir sigurin liggur Skanderborg Århus Håndbold á 9. plássi, við 10 stigum eftir 12 dystir. Átta tey fremstu liðini sleppa við í endaspælið.
Jónas skeyt sjey
FIF og Jónas Gunnarson Djurhuus vunnu leygardagin á torførum útivølli. Teir vóru undirtippaðir áðrenn dystin, men seinastu vikurnar í donsku 1. deild, hava víst okkum at føroyingaliðið ikki skal undirmetast. Undan dystinum gav FIF-sigur peningin umleið seks ferðir aftur.
Aftur í dag vunnu teir við einum máli. Hesa ferð ímóti Rækker Mølle sum undan dystinum lógu á 5. plássi. Jónas skeyt sjey mál í sigrinum, meðan Leivur Mortensen skeyt fimm mál.
Jónas Gunnarson Djurhuus hevur skotið nógv mál fyri felagið seinastu tíðina. Í oktober mánaði var hann tann sum hevði skotið triðflest mál í deildini tann mánaðin.
Leivur Mortensen sum mátti finna sær nýtt felag eftir at Ajax Keypmannahavn fór á húsagang hevur eisini spælt væl síðan hann kom til felagið. Seinasta dyst avgjørdi hann við at skjóta seinasta málið, tá teir vunnu 34-33 á Roskilde. Aftur í dag var hann eisini avgerðandi.
FIF sum ikki hevði stóru vónirnar áðrenn kappingin fór í gongd, og vóru tippaðir at liggja í botninum í deildini í ár, liggja nú á 5. plássi.
Fleiri dystir leygardagin
Fleiri av hondbóltsútisetunum skulu í dyst seinni í dag. Í Íslandi spælir ÍBV, við Janusi Dam Djurhuus og Dánjali Ragnarssyni ímóti Grotta.
Follo, við Teis Horn Rasmussen, spælir ímóti OSI, í næstbestu deildini í Norra.
Pætur Mikkjalson í svenska felagnum AMO HK, í næstbestu deildini skal leika ímóti Tyreso.
Somuleiðis í Svøríki skal felagið hjá Óla Mittún og Eliasi á Skipagøtu spæla steypadyst ímóti Hammarby.
