Hetta var størsti sigurin nakrantíð á útivølli

Føroyar vinna ikki landsdyst í fótbólti á hvørjum ári. 4-0 sigurin ímóti Liktinstein í gjárkvøldið var tann fyrsti síðani 25. september í 2022, tá ið sigurin í tølum var teprari enn tann í gjárkvøldið, og tá ið hann var ímóti størri mótstøðutjóð. Ta ferðina vunnu Føroyar 2-1 á heimavølli ímóti Turkalandi.

Í gjárkvøldið spældu Føroyar altjóða skrásett nummar 239, síðani fyrsta altjóða skrásetta dystin, sum varð spældur í Íslandi 24. august í 1988. Føroyar eru altso farnar undir 37. landsliðsárið, og sigurin í gjárkvøldið var nummar 36. Ella við øðrum orðum er í miðal eitt ár millum sigrarnar.

Longstu turkirnir vóru fimmára skeiðini frá 1990 til 1995 og frá 2004 til 2009.

Tað er møguleiki fyri at bøta um miðaltalið seinni í ár. Umframt vinardystin týskvøldið ímóti Danmark á Brøndby stadion vera átta dystir seinni í ár. Í Baltic Cup verður Estland mótstøðuliðið 8. juni, og tríggjar dagar seinni verður mótstøðuliðið Lettland ella Litava. Og í heyst vera seks dystir í Nations League: 7. september Norðurmakedonia (h), 10. september Lettland (ú), 10. oktober Armenia (h), 13. oktober Lettland (h), 14. november Armenia (ú) og 17. november Norðurmakedonia (ú).       

Føroyar hava átta ferðir dystast við Liktinstein, og 4-0 sigurin í gjárkvøldið var tann áttandi ímóti Liktinstein. Samstundis var talan um størsta sigur yvirhøvur aðrastaðni enn í Føroyum. Undan hesum dystinum var tað 4-1 sigurin í Gibraltar fyrsta mars 2014, sum var tann størsti á útivølli.

Størsti heimasigurin er framvegis 5-1 ímóti Liktinstein 7. juni 2021.