SEMJA: Starvsfelagið hevur gjørt nýggjar 1 ára sáttmálar við ávikavist Fíggjarmálaráðið og Kommunala Arbeiðsgevarafelagið, sum gevur øllum limum, sum starvast hjá landi og kommunum, eina søguliga lønarhækking á samanlagt 7,65%. Sum heild er nevndin nøgd við úrslitið.
Aftur hesa ferð kom Semingsstovnurin uppí samráðingarnar, og semingsuppskotið var lagt fyri partarnar hóskvøldið 7. novembur. Á middegi í dag, fríggjadagin 8. novembur, var greitt, at Starvsfelagið, Fíggjarmálaráðið og Kommunala Arbeiðsgevarafelagið høvdu góðtikið semingsuppskotið, og semjan varð undirskrivað í hølunum hjá Semingsstovninum.
Semingsskjalið kann lesast her: https://www.starvsfelag.fo/.../semingsuppskot-8-11-24.pdf
LØNARHÆKKINGIN 7,65% TILSAMANS
Nýggju sáttmálarnir eru 1 ára sáttmálar og eru galdandi frá 1. oktobur 2024 til 30. septembur 2025. Lønirnar hækka soleiðis í sáttmálaskeiðnum:
*1. oktobur 2024 hækka lønirnar 4,75%
*1. apríl 2025 hækka lønirnar 2,9%
Lønarhækkingin 1. apríl 2025 er vegna serligu umstøðunum við methøgari inflatión í seinasta sáttmálaskeiði, sum hevði við sær, at karmurin fyri almenna arbeiðsmarknaðin varð broyttur, eftir at Starvsfelagið skrivaði undir semju 13. januar 2022. Harvið hava vit tryggjað okkara limum somu lønarhækking sum hini fakfeløgini á almenna arbeiðsmarknaðinum seinastu 3 árini.
Lønartalvan við lønarhækkingum er her: https://www.starvsfelag.fo/.../l%C3%B8nartalva-vi%C3%B0-h...
NÝGGJ LØNARTALVA Í 2025
Nýggja lønartalvan, sum hevur verið umrødd í fleiri ár í ymsum avtalum, er nú við í semjuskjalinum. Partarnir hava bundið seg at endurskoða lønartalvuna og flokkingar, hetta arbeiðið skal vera liðugt 1. juni 2025.
Núverandi lønartalva er frá 2001 og krevur dagføringar fyri at hóska til arbeiðsmarknaðin, sum hann sær út í dag. Starvsfelagið hevur gjørt eitt uppskot til nýggja lønartalvu, sum partarnir nú skulu arbeiða víðari við.
NEYÐTILBÚGVING OG ARBEIÐSSTEÐGIR
Ein greið avtala skal gerast um neyðtilbúgvingina í samband við arbeiðssteðgir, sum tryggjar, at lív, heilsa og týðandi samfelagslig virði ikki verða sett í vanda. Hetta merkir, at undantøk verða avtalað og skjalfest í samband við verkfall. Í hesum sambandi fer Starvsfelagið ikki at avmarka verkfalsrættin, men heldur er talan um, at tey undantøkini, ið vanliga verða givin í samband við verkfall, nágreinað og skjalfest.
AÐRAR BROYTINGAR
Eisini eru aðrar broytingar gjørdar fyri einstakar stovnar og arbeiðspláss, so sum Sjúkraflutningstænastan, Kringvarp Føroya, Sløkkiliðsstøðin, hjálparfólk á Ellisheiminum, Strandfaraskip Landsins, umframt ein broyting í orðingini um professiónsbachelorar, sum gera lønarflokkin meira rúmligan.
FORMAÐURIN FEGNAST UM SEMJUNA
- Sæð í ljósinum av, at tað eydnaðist okkum at hála tað innaftur, sum vit komu afturút, tá politiska skipanin avgjørdi at vraka karmin, ið var lagdur í januar 2022, umframt eina lønarhækking á 4,75%, sum samanlagt gevur øllum limum felagsins eina lønarhækking á 7,65%, so kann eg ikki annað enn at siga, at eg eri nøgdur, sigur Súni Selfoss.
- Hetta er ein søguliga høg lønarhækking, sum, tá onnur virði í semjuni eru tikin við, nærkast væl teimum 8 prosentunum. Eg fegnist eisini um, at tað hevur eydnast at fáa ásett eina tíðarrammu, nær ein nýggj dagførd lønartalva skal verða liðug, og at hon skal koma í gildið 1. oktobur 2025, sigur formaðurin avgjørdur.
- Annars vil eg takka nevnd og umsiting fyri gott arbeiðslag og konstruktivar samráðingar.
https://www.starvsfelag.fo/.../sogulig-lonarhaekking.../
