Heilsufrøðiliga Starvsstovan hevur savnað føðsluvirði, vitaminir og mineralir fyri føroyskar matvørur í eina talvu. Føðslutalvan gevur yvirlit yvir nøgd av føðsluevnum í ávísum siðbundnum føroyskum mati og føroyskt framleiddum mati.
Í talvuni eru virðir fyri umleið 80 matvørur, t.d. sperðil, ræstan fisk og frystar rabarbur. Fyri fleiri av matvørunum eru føðsluvirði og flestu vitaminir og mineralir, fyri aðrar matvørur eru einans einstøk virði tøk.
Talvan er gjørd eftir Føroyskum føðslutalvum, sum eru gjørdar, umframt eftir kanningum, Heilsufrøðiliga starvsstovan hevur gjørt í 2021-2023. Og at enda er hon eisini bygd á upplýsingr frá føroyskum matframleiðarum.
Føðslutalvan verður útbygd so hvørt, sum Heilsufrøðiliga Starvsstovan ger kanningar av øðrum føroyskum mati ella úrslit fáast til vega frá framleiðarum ella frá aðrari gransking.
Frábrigdið í matvørum kann vera stórt, og tí ger Heilsufrøðiliga Starvsstovan vart við, at føðsluvirðið kann broytast alt eftir árstíðini og hvussu maturin verður goymdur og viðgjørdur. Og tí eru tølini vegleiðandi.
Stórur partur av kostinum hjá føroyingum er útlenskur, men í tí sambandi verður víst til føðslutalvur í okkara grannalondum.
Tann føroyska føðslutalvan kann takast niður her: Føroysk føðslutalva
