Hennara løg og tekstir eru samstundis sterkir og skroypiligir

Rebekka Petersen kemur á HEIMA 2018 – páskaaftan 2018. Vit spurdu hana um hvør hon er. Svarið var stutt, og greitt:

"Eg eiti Rebekka Petersen. Eri 23 ár. Gangi til dagliga á HF".

Vit vendu okkum til ein av teimum sum fylgir væl við tí sum hendir á føroyska tónleikapallinum, Niels Uni Dam ella NUD, sum hann ofta kallar seg.
Hann sigur at listakvinnan Rebekka Petersen er ein innilig og følin songkvinna, ið bergtekur lurtaran.

"Hennara løg og tekstir eru samstundis sterkir og skroypiligir og røddin er heilt egin," sigur hann.

Hon varð innstillað til heiðsurlønina sum besta songkvinna í popp/rokk bólkinum á FMA í 2014. Hetta var fyri songrøddina á debut fløguni “Byggi Borgir”. Hon hevur síðan givið fleiri stakløg út, ikki minst saman við bólkinum Steso.

Steso átti eina av ársins bestu útgávum í fjør og leikluturin hjá Rebekku var markantur.

Steso hava eisini gjørt um seg í útlandinum, eitt nú í Karrierekanonen hjá Danmarks Radio.