HOYMAsligt er ein nýggj røð av heimakonsertum frá G! Grunninum. Sum heitið bendir á, so líkist HOYMAsligt tí, sum fólk kenna frá HOYMAbit og HOYMA. Endamálið er at seta tónleikin, hugnan og nærleikan í hásæti og konsertirnar verða hildnar heima hjá privatfólki í Norðragøtu.
Talan er um avmarkað tal av áhoyrarum, tí seld verða einans 20 atgongumerki til hvørja konsert.
Afturvið konsertini bjóða vertirnir kaffi og okkurt søtt.
Fyrsta konsertin í røðini verður leygarkvøldið 27. februar. Á skránni er Eivør Pálsdóttir.
Tey sum fara at spæla HOYMAsligt næstu leygarkvøldini frá 27. februar fram til 1. mai, verða umframt Eivør, Marius Ziska, Guðrið Hansdóttir, Lena Anderssen, Lyon Hansen, Høgni Lisberg, Kári Sverrisson.
Atgongumerki á 260 krónur verða sett til sølu á atgongumerki.fo fríggjadagin 19. februar kl 12.00.
