Marglistamaðurin, Heiðrik á Heygum, fekk fyrr í vikuni Listaflog-stuðulin fyri 2018. Páskaaftan stendur hann í tveimum stovum í Nólsoy og upptraðkar akustiskt.
HEIDRIK/Heiðrikur á Heygum er listamaður, filmsleikstjóri og tónleikari. Hann er nýligani fluttur heim aftur til Havnar aftaná at hann hevur fingið prógv frá listaskúla í Reykjavík. Hann flutti til Íslands í 2014, og brúkti fyrstu tíðina til at gera upptøkurnar til útgávuna «Funeral», sum kom í 2016.
Í sendingini Kvørnin hjá Kringvarpinum segði Urð Johannesen at Heidrik á Funeral rættiliga foldar seg út sum sangara, og at útgavan er flott, gjøgnumførd og persónlig.
Tónleikurin hjá Heiðriki kann tulkast sum melankolskur, myndaríkur við einum farra av skemti í sær. Tónleikurin hevur sínar røtur í jazztónleikinum sum var frammi í árunum frá 1920 til 1950’ini. Hansaras arta rødd hevur verið samanborin við tónleikarar sum Anohni úr Antony and the Johnsons og Roy Orbison.
Listaflogstuðulin skal brúkast til eina framsýning á Det Nordatlantiske Fyr í Hanstholm í Danmark í oktober, og eftir hetta verður framsýningin eisini sett upp í Føroyum. Talan er um eina video-innstallatións-framsýning, hvørs endamál er at lýsa Føroyar sum eina livandi veru.
Hann hevur í fleiri ár arbeitt innan fleiri listagreinar. Vit kenna hann millum annað frá tónleika- og filmsframleiðslu, men nú sleppa vit á fyrsta sinni at síggja hann á einum føroyskum festivali sum tónleikara.
Atgongumerkir til heima fáast á www.atgongumerki.fo
.jpg)
