HB hevur verið partur av øðrum hvørjum stórsteypadysti

Klokkan 17.30 fer fótbólturin aftur á rull, tá ið KÍ og HB fara at spæla stórsteypadystin. Tað eru FSF og Lions Club, sum skipa fyri, og inntøkan fer til Beran, sum hevur yvir 20 ár á baki og virkar fyri, at børn og foreldur í sorg, sum frá líður, gerast betur før fyri at handfara sorgina og á tann hátt hava størri møguleika fyri aftur at fáa eitt gott og innihaldsríkt lív, har tey mennast og læra at liva við sorgini, sum tað varð orðað í tíðindaskrivinum, tá ið Lions Club greiddi frá um dystin.

Søgan um stórsteypadystin hjá monnum gongur aftur til 2007. Tað vil siga, at í dag er 18. stórsteypadysturin.  Stórsteypadysturin er millum tey, sum undanfarna árið vóru best í landskappingini og steypakappingini.

Higartil hevur Víkingur vunnið stórsteypið oftast – fimm ferðir. HB hevur vunnið fýra ferðir, og KÍ hevur vunnið tríggjar ferðir. HB hevur tapt fýra dystir um stórsteypið, og KÍ hevur tapt ein stórsteypadyst.

Dysturin í dag er millum KÍ, sum í fjør vann FM fyri triðja ferð á rað og HB, sum í fjør vann steypakappingina fyri 29. ferð. Tað var í finalu ímóti B68. Eftir longda leiktíð var tað framvegis málleyst. So var neyðugt við brotssparkskapping, sum HB vann.

Stórsteypadystur: KÍ – HB: Bjarki Danielsen kl. 17.30.

faroesoccer.com