HB boðar í kvøld frá, at felagið hevur skrivað undir sáttmála við Amidou Diop.

33 ára gamli senegalesiski spælarin kom í vár til TB. Fyrsti dysturin hjá honum var, tá ið TB flaggdagin tapti 3-2 í Gundadali ímóti HB.

Tá bar tað beinanvegin til at staðfesta, at TB hevði keypt sera góðan spælara, sum var stinnur í fótbóltsspælinum og sterkur í nærdystum og skilagóður við bóltinum.

Amidou Diop var besta TB spælarin í 2025, og nú er tað greitt, at hann eisini í 2026 fer at spæla í bestu deildini, hóast TB flutti niður í næstbestu deildina.

HB hevur tryggjað sær Amidou Dion, sum er sera væl skikkaður til bæði at spæla í miðverjuni og á miðvøllinum.