Tað hevur verið trupult hjá Hávardi Vatnhamar at vinna sær luttøku til Paralympisku leikirnar í Tokyo í summar, tí fáar kappingar hava verið í hesum koronatíðum. Men við at skifta ítróttargrein – frá triatlon til maraton – vónar hann at vinna sær luttøku til leikirnar umboðandi Føroyar.

Orsøkin til, at Hávard var tilmeldaður hesa kappingina, var, at hann skal verða flokkaður (klassifiseraður) í samband við roynd sína at kvalifisera seg til Paralympisku leikirnar í Tokyo.

Hóast Hávard satsar uppá maraton teinin og rann 5.000 metrar í Italia, má sigast at tað gekk væl í hansara fyrstu kapping undir føroyskum flaggi í para frælsum ítrótti.

Málið var at renna undir 18 minuttir, og kom hann inn sum nummar fimm í samanlagda bólkinum við tíðini 17:53.81. Hávard var nummar eitt í sínum flokki.

Næsta uppgávan er at renna Copenhagen Marathon, ið verður 16. mai, har málið er at renna teinin undir tríggjar tímar. Fyri at kvalifisera seg til Paralympisku leikirnar, so er kravið hjá Hávardi at renna eitt maraton undir kravtíðina innan 1. juni.

Fakta:

Flokking (klassifisering) er ein av hornasteinunum í paraítrótti.

Endamálið er at tryggja eina rættvísa kapping.

At flokka merkir, at ítróttarfólk verða flokkað í flokkar - alt eftir breki og virkisstøði í tí serstaka ítróttinum.