Ruth Vang, landsstýriskvinna í fíggjarmálum, hevur nú valt nýtt Búskaparráð - og Búskaparráðið er eisini nevndin fyri landsbankan.
Ráðið er valt eftir tilmæli frá stýrinum fyri Fróðskaparsetrið. Førleikakrøv til limirnar eru: Búskaparfrøði, fígging og kreditmeting, føroyskt vinnulív og serligt innlit í føroyska fíggjargeiran ella búskapin í Føroyum.
Og nú nýtt ráð er valt, er eisini greitt, at Búskaparráðið fær nýggjan formann, og somuleiðis eru tveir aðrir nevndalimir eisini nývaldir.
Tey, sum eru vald eru:
Johnny í Grótinum, kandidatur í búskaparfrøði, námslektari á Fróðskaparsetrinum, og hann er eisini nýggjur formaður.
Jan Otto Holm, kandidatútbúgving í búskaparfrøði, sjálvstøðugur ráðgevari og undirvísari.
Hans Ellefsen, PhD-útbúgving í búskaparfrøði, lektari á Fróðskaparsetrinum.
Marjun Weihe Thomassen, kandidatur í búskaparfrøði, fíggjarleiðari á Landsverki.
Anja Rein, diplomútbúgving innan banka og leiðslu og stjóri í Demich
Ráðið situr í trý ár.
Johnny í Grótinum og Jan Otto Holm hava verið limir í nevndini í Landsbanka Føroya seinastu trý árini. Hini trý eru øll nývald.
Johnny í Grótinum hevur eisini áður verið formaður í búskaparráðnum, hann varð formaður í 2005.
Tey, sum eru farin úr nevndini, eru Fróði Magnussen, sum var formaður, umframt Sanna Laksá og Helena Andreasen.
