Afturhildni hvítarussiski andstøðingurin Raman Pratasevitj var í gjár í hvítarussiska ríkissjónvarpinum, har samrøða var við hann. Í samrøðuni kom hann inn á, at hann hevði lagt ætlanir at skipa fyri mótmælisgongum móti stjórnini og segði, at hann virdi Alexander Lukasjenko, forseta. Hann endaði samrøðuna við tárum í eygunum, har hann umbar seg fyri sínar gerðir og ætlanir.
Familjan hjá Pratasevitj og andstøðan siga, at hann bleiv noyddur av núverandi stjórn til at hava hesa samrøðuna.
Pratasevitj sigur í samrøðuni, at hann luttekur av sínum egnum vilja.
– Eg eri næstan vísur í, at eg verið fordømdur, og at ein mótmælisgonga at vísa mær stuðul ikki verður til nakað, men eg eri líkaglaður, sigur hann í samrøðuni.
– Eg viðurkendi mína skuld, at havi havt ætlanir at fyriskipa ikki góðkend mótmæli. Eg havi funnist at Alexander Grigoryevitj (Lukasjenko), men tá eg hevði sett meg meira inn í tingini, byrjaði eg at skilja, at hann ger tað rætta, og tað virði eg hann fyri, segði Pratasjevitj millum annað í samrøðuni, ið vardi í hálvan annan tíma.
Tann 24. mai ”játtaði” Raman seg sekan í ríkissjónvarpinum við hovnum andliti og tí, sum líktist einum bláum merki á pannuni. Á upptøkuni sigur hann seg ”hava játtað seg sekan í at hava skipað fyri mótmælum í Minsk”. Tá segði hann eisini, at løgreglan fór ”rætt og lógliga” við sær.
Merkir á hondliðum vekir ans
Í samrøðuni, tá Raman Pratasevitj sigur, at hann angrar sínar gerðir, tekur hann hendurnar fyri andlitið og tá síggjast nøkur merkir á hondliðunum.
Danska TV 2 hevði samrøðu við litaviska uttanríkisráðharran, Gabrielius Landsbergis, í gjárkvøldið, sum kallar merkini fyri “pínslumerkir”. Pratasevitj hevur búð í Litava síðani 2019, eftir at hann flýddi úr Hvítarusslandi.
Hvítarussisku myndugleikarnir hava fleiri ferðir áður hildið fast um, at hesar játtanir í ríkissjónvarpinum frá andstøðingum eru gjørdar av egnum fríum vilja.
Raman Pratasevitj varð handtikin, tá flogfarið hann var í varð tvingað til at seta seg í Hvítarusslandi. Flogfarið var á veg úr Athen til litaviska høvuðsstaðin Vilnius.
Altjóða samfelagið og felagsskapir - millum annað Amnesty - hava fordømt hesa atgerð hjá Hvítarusslandi og krevja eisini, at afturhildni journalisturin og andstøðingurin verður leyslatin í stundini.
.png){kind=logo}
