Grønlendskur tjóðardagur í dag

21. juni 2009 fekk Grønland sjálvstýri, men tjóðardagurin hevur verið hildin síðani 1983

Sigurjón Einarsson
21. juni 2021 kl. 14:25

Í dag er tjóðardagur í Grønlandi, sum er ein fólkaveitsla, ið verður hátíðarhildin í øllum landinum.

– Hvørt stað hevur eina skrá, sum millum annað ljóðar upp á felags morgunssang, røðum, gudstænastu, kaffemik og eisini undirhaldi sum til dømis tónleiki, fólkadansi, framsýning av góðum kajakk dugnaskapi og so framvegis, skrivar visitgreenland um stóra dagin.

Grønlendski samleikin er í miðdeplinum á degnum, har flaggið, klædnabúnin, sangurin og málið verða heiðrað.

Eisini drotningin letur heilsa á stóra degnum.

Á sosialum miðlum – millum annað á Facebook og Instagram – hevur kongahúsið deilt eina mynd av drotningini, sum er ílatin grønlendska tjóðarbúnan, har hon sendir eina heilsan til grønlendska fólkið:

– Í dag er tjóðardagur í Grønlandi, og í hesum sambandi sendir Hennara Hátign Drotningin síni bestu ynskir til grønlendska fólkið.

Í dag eru eisini 11 ár síðani, at nýggja sjálvstýrislógin kom í gildi í Grønlandi. Í nýggju sjálvstýrislógini varð staðfest, at grønlendska fólkið er eitt fólk við atliti til fólkarættin og hevur sjálvavgerðarrætt, eins og sagt verður í uttanríkispolitisku heimildarlógini fyri Føroyar.

Í 2009 varð eisini staðfest, at grønlendskt er almenna málið í Grønlandi.