Grønland er í einari viðkvæmari støðu, nú koronafarsóttin herjar kring heimin, tí stór frástøða er millum smærri bygdirnar og býirnar, ið hava avmarkaðar heilsuhentleikar á staðnum.
Sambært donsku heilsumyndugleikum kann sjálvt eitt lítið smittutal fáa stórar avleiðingar fyri heilsuviðurskiftini á staðnum.
Og júst av hesi orsøk, at halda trýstið á heilsuverkið so lágt sum møguligt, heldur grønlendska sjálvstýrið, at eingin eigur at ferðast inn ella út av landinum í jólaferiuni.
- Tess fleiri ferðast inn til landið, tess størri er vandin fyri smittu í Grønlandi. Tí mælir grønlendska sjálvstýrið øllum virkjum, myndugleikum og fólkum frá, at ferðast verður óneyðugt komandi tíðina. Hetta verður serliga galdandi, tá vit nærkast jólum, skrivar grønlendska sjálvstýrið á Facebook.
Tá ið ferðast verður til Grønlands, so skal ein fara í sóttarhaldi í fimm dagar eftir komu. Á fimta degi skal ein lata seg kanna aftur.
Flogforboð í tríggjar mánaðir
Danski flutningsráðharrin hevur sett eitt flogforboð í verk móti ferðafólkaflogførum fram til januar komandi ár. Air Greenland er tó undantikið á rutuni millum Keypmannahavn og Nuuk og Kangerlussaq.
Í alt hava tað verið 18 koronasmittaði í Grønlandi. 17 eru blivin frísk aftur og eingin hevur verið innlagdur.
Kelda: knr.gl
