Ein stór felagsvenjing er í hesum døgum í og umkring Qoornoq, sum liggur í Nuuk-fjørðinum norðanfyri høvuðsstaðin. Tað er Arktisk Kommando, grønlendskan løgreglan umframt amerikonsk Hercules flogfør, ið luttaka í venjingini, sum hevur fingið heitið Arctic Light, og er í døgunum frá 1. til 12. november.
Men ein tílík venjing kann koma út fyri óvæntaðum hendingum, ið ikki ber til at vita nakað um frammanundan – ella kanska allíkavæl, tí mánadagin, tá ein hending við einum skriðulopi og eftirfylgjandi flóðaldu í Qoornoq skuldi venjast, stungu trupulleikar seg upp vegna illveður.
Varastjórin fyri Arktisk Kommando, Dan. B Termansen, ásannar yvirfyri P1 hjá DR, at illveður eigur ikki at vera nøkur forðing, tí hetta eru støður, ið kunnu stinga seg upp í veruleikanum.
Illveðrið hevði millum annað við sær, at tilfar, sum skuldi brúkast í venjingini, ikki kom vegin fram til Nuuk.
Venjingin hendan dagin skuldi annars ímynda, at ein flóðalda rakar eina bygd, har brúdleyp er á skránni, umframt at fleiri veiðumenn eru í økinum, sum mann ikki veit, hvar teir eru. Til venjingina skuldu fólk plaserast ymsastaðni á einum fjalli, sum skulu finnast, umframt dukkur í sjónum, ið skulu bjargast.
Meiningin við venjingini er at menna og venja tilbúgvingardeildina hjá Arktisk Kommando, so hon kann setast inn, tá óvanligar hendingar, sum eitt nú skriðulop og flóðalda, henda.
