Meðan kjakið í Føroyum í seinastuni hevur verið um, at tað eisini skal verða møguligt at selja øl og vín í matvøruhandlum, so hevur kjakið í Grønlandi í seinastuni verið at taka rúsdrekka úr matvøruhandlunum, og seta á stovn rúsdrekkasølu - eins og vit kenna tað í Føroyum.
Síðani 1953 hevur tað verið møguligt at keypa rúsdrekka í matvøruhandlum í Grønlandi. Nú ynskir politiski flokkurin, Inuit Ataqatigiit (IA), at rúsdrekkasølan verður tálmað í landinum.
Tað skrivar grønlendski miðilin Sermitsiaq.
Flokkurin IA arbeiðir nú við at leggja uppskot fyri grønlendska landsstýri í heyst, har øl, vín og rúsdrekka verður tikið av hillunum í matvøruhandlum og bert seld frá serligum sølustøðum.
Framsøgukvinnan fyri IA aftanfyri hesum uppskotinum, Charlotte Pike, heldur, at Grønland og Danmark í dag skilja seg negativt út í Norðurlondum - við at hava tær mest liberalu reglurnar fyri, tá tað kemur til at lýsa og selja rúsdrekka.
– Í restini av Norðurlondum hava tey serlig sølustøð fyri rúsdrekka, har tað heldur ikki verður lýst við rúsdrekka. Hetta, so børn og ung ikki byrja at drekka á ungum aldri, eins og tilfelli er hjá okkum, greiðir hon frá, sambært Sermitsiaq.
