Tá ið løgtingið fyrrapartin í dag fyri fyrstu ferð síðani valið 26. mars savnaðist, var tað merkisvert, at einki javnaðarumboð úr syðri helvt av Suðuroy er í tinginum. Hetta er fyrsta ferðin síðani á valinum í 1932, at eingin úr syðru helvt av Suðuroy er í tingbólkinum hjá Javnaðarflokkinum.
Hesa ferð vóru tvey javnaðarumboð í Suðuroy vald í tingið. Tey eru Bjarni Hammer og Súsanna Bertholdsen. Undan hesum valinum vóru Bjarni Hammer á Tvøroyri og Henrik Old úr Vági javnaðarumboð í Suðuroy vald í løgtingið, og tá ið Aksel V. Johannesen skipaði landsstýri, varð Súsanna Bertholdsen tingkvinna.
Tvey valevni úr syðru helvt av Suðuroy vóru hesa ferð á javnaðarlistanum. Dagfinn Olsen í Vági fekk 114 persónligar atkvøður og endaði á 15. plássi, og Jákup á Dul Sørensen í Porkeri fekk 100 persónligar atkvøður og endaði á 16. plássi.
Javnaðarflokkurin hevur frá á valinum í 1936 og fram til valið 26. mars í ár havt umboð við bústaði í syðru helvt av Suðuroy. Átta menn við bústaði í syðra parti av oynni hava umboðað Javnaðarflokkin í løgtinginum fram til valið í mars í ár.
Henrik Old varð fyrstu ferð valdur í 1984, og hann var í tinginum fram til valið 26. mars. Undantakið var valskeiðið 2008 og fram til 2011. Tað komst av, at Henrik ikki bjóðaði seg fram á valinum í 2008. Tá var Hans Pauli Strøm sáli, sum var ættaður úr Vági og búði í Vestmanna, tingmaður.
Fyrsti tingmaður fyri Javnaðarflokkin og við bústaði í syðru helvt av Suðuroy var J. H. Danbjørg í Porkeri, sum fyrstu ferð varð valdur í løgtingið í 1936. Tað var á tí valinum, at tingumboðanin hjá Javnaðarflokkinum øktist úr tveimum og upp í seks umboð. Danbjørg sat – burtursæð frá tíðarskeiðnum 1945-1950 – í tinginum fram til hann doyði 23. juli í 1968.
Jacob Nielsen, sum var vitameistari í Akrabyrgi og var ættaður úr Nólsoy, var tingmaður 1936 – 1943, tá ið hann ikki stillaði uppaftur, tí hann flutti til Mykinesar. William Smith í Vági var tingmaður 1945 – 1950. Dion Nolsøe í Vági var javnaðartingmaður 1958 – 1962 og aftur eftir at Jóhan Danbjørg doyði 23. juli í 1968 og fram til 1970.
Jóan Pauli Thomassen í Vági varð valdur á ting fyri Javnaðarflokkin í 1966, og í desember 1970 og inntil valið í 1974 var hann varamaður fyri Atla P. Dam, sum var løgmaður.
Hilmar Bech í Porkeri var tingmaður 1970 – 1984, og so var tað, at Henrik Old í Vági varð valdur í løgtingið. Mikkjal Sørensen í Porkeri kom í tingið, tá ið Jóannes Eidesgaard 15. januar í 1991 varð landsstýrismaður. Mikkjal var løgtingsmaður fram til valið 7. juli 1994.
