Fýra fólk eru stevnd av kanningarnevndini, sum kannar álopið á kongressina 6. januar. Tey fýra vóru øll partur av “innara sirklinum” hjá fyrrverandi forsetanum, skrivar politico.
Hesi fýra eru hansara seinasti stápsstjóri Mark Meadows, Kash Patel frá Pentagon, Dan Scavino, ið hevði ábyrgdina av sosialu miðlunum hjá fyrrverandi forsetanum. Eisini tann kendi Steve Bannon, fyrrverandi ráðgevi hjá Donald Trump er stevndur.
Tey eru øll innkallaði at geva frágreiðing fyri kanningarnevndini um miðjan oktober.
Kanningarnevndin hevur seinastu tíðina kannað nógv skjøl frá føderalu myndugleikunum og frá feløgunum, ið vara av teimum sosialu miðlunum, skrivar AP.
Endamálið er at finna útav, hvat gekk galið, tá Trump-viðhaldsfólk lættliga komu gjøgnum sperringarnar og stormaðu kongressbygningin í hópatal.
