Franski heilsumálaráðharrin, Olivier Véran, greiddi í gjár frá, at kvinnur – undir 25 ár – fara at fáa tilboð um ókeypis fyribyrging. Tilboðið um ókeypis fyribyrging kemur, eftir at talið av yngri kvinnum, ið nýta fyribyrging er fallandi.

– Tað er nívandi, at kvinnur ikki kunnu brúka fyribyrging, um tær ynskja tað, tí tað er vorðið ov dýrt, segði hann í samrøðu við sjónvarpsstøðina France 2.

Tað skrivar Danmarks Radio.

Tilboðið verður galdandi fyri hormonfyribyrging sum eitt nú p-bollar, mini-bollar og p-ringar.

Sambært fleiri fronskum miðlum skal fíggjarligi stuðulin eisini verða galdandi fyri læknaviðtalu og røkt í samband við nýtslu av fyribyrging.  

Í dag er tað longu ein møguleiki fyri gentur og kvinnur í aldursbólkinum 15 til 18 ár at fáa ókeypis fyribyrging í Fraklandi.