Kanska heimsins kendasta málarí, Mona Lisa, varð í gjár vandaliserað av einum ungum manni, ið var íklæddur sum ein eldri kona.
Ungi maðurin var vápnaður við einari fløtakaku, sum hann tveitti á tað meira enn 500 ára gamla málaríið hjá Leonardo da Vinci.
Tað gekk ikki rúm tíð, so komu vaktir á staðið og tóku mannin av ræði, meðan hann tveitti reyð rósubløð út á gólvið.
Lukkutíð hendi einki við Mona Lisu, sum kundi halda fram við at smílast við sínum gátuføra smíli, tí skottrygt glas er sett upp á málaríið.
Síðan 1950-ini hevur Mona Lisa verið dekkað av glasi, eftir fleiri herverk vórðu framd móti henni. Millum annað var hon álopin við sýru í 1956, sum er eitt sindur ógvisligari enn ein fløtakaka.
Eitt starvsfólk á Louvre-savninum pussaði glasið, meðan tann ungi maðurin, sum varð førdur út av vaktum, rópti “fólk royna at oyðileggja jørðina – hugsið um jørðina”.
