Tað má hava verið ringast duldi loynidómur, at enska fótbóltsfelagið, Newcastle, skuldi hava nýggjan venjara.
Líka síðan tað fyrst í oktober kom fram, at ein saudiarabiskur íløgugrunnur hevði keypt partapeningin í Premier League-felagnum, Newcastle, hava søgurnar gingið um, at ein nýggjur venjari skuldi setast at leiða felagið.
Steve Bruce, sum í síni tíð var verjuleikari og liðskipari í Manchester United, var vigaður og funnin ov lættur av nýggju eigarunum, sum vilja hava ein “betri” venjara, ella í øllum førum ein kendari venjara til at standa fyri nýggja ríkmannafelagnum, tí ríkasta av øllum, siga útlendskir miðlar.
Og í dag komu tíðindini so á heimasíðuni hjá felagnum, at Steve Bruce er farin úr starvi.
Steve Bruce hevur verið venjari í Newcastle í tvey ár, og hann hevur klárað at hildið liðinum uppi í bestu ensku fótbóltsdeildini, um enn tað ikki hevur givið serliga góðar plaseringar.
Men nú felagið er yvirtikið av nokk tí størsta íløgugrunninum í heiminum, er hann ikki mettur at vera rætti maðurin at leiða liðið.
.png){kind=logo}