Klokkan 17.30 verður fyrsta bríksl í Faro í Portugal. Føroyska U-21 landsliðið í fótbólti fer at spæla fyrsta undankappingardystin í ár. Síðani 16. juni í fjør hevur liðið undir leiðslu av Eyðuni Klakstein og við Atla Gregersen sum hjálparvenjara, spælt fimm dystir. Úrtøkan er tveir sigrar, ein javnleikur og tvey tap. Føroyar hava vunnið ímóti Hvítarusslandi og Andorra á útivølli og spælt javnt ímóti Andorra á heimavølli.
Føroyar taptu 4-2 á heimavølli ímóti Kroatia, og síðsti dysturin síðsta heyst var, tá ið Føroyar taptu 3-0 í Grikkalandi.
Í kvøld verður mótstøðan heilt stór, og tað kann enda við trivaligum tapi, men Eyðun Klakstein avskrivar ikki møguleikan fyri, at tað fer at eydnast at røkka góðum úrsliti:
-Portugal hevur spælt heilt væl í fýra dystum og vunnið teir. Ímóti Grikkalandi tapti Portugal, og tá var Grikkaland omaná. Í kvøld fara vit at verða kroystir aftur á vøllin, og tað kann bera okkara møguleika við sær, um tað eydnast at halda tætt. Portugal fer ivaleyst at undirmeta okkum, og teir eru ikki so grammir at verja. Um tað eydnast at taka ferðina úr spælinum, so teir verða ørkymlaðir, so fer tað kanska at bera við sær møguleika fyri skjótum mótálopum, heldur Eyðun Klakstein.
Onkrir av teimum, sum higartil hava verið lyklaspælarar, eru ikki við í Portugal. Áki Johannesen og Samuel Chukwudi hava verið skaðadarvaðir og eru ikki við í Portugal, og tað er álopsspælarin Jørgen Nielsen heldur ikki. Hann er ikki komin fyri seg enn, eftir at hann fyri nøkrum vikum síðani breyt bein í fótinum.
Ein annar av lyklaspælarunum, Olaf Bárðarson, hevur seinastu vikurnar verið skaðadarvaður, men hann er í hópinum í Portugal.
Tað fer at bera til at fylgja við í Televarpinum.
