Fleyr vann trivaligan sigur

Í dag vóru stórsteypadystirnir í ítróttarhøllini á Sandi. Í kvinnudystinum var eingin spenningur yvirhøvur. Fleyr vann lættliga 3-0 ímóti Drátti.

Dráttur, sum vann greipuna seinasta kappingarár, hevði fáar leikarar eftir av teimum, sum spældu mest tá, meðan Fleyr ikki hevur mist tað nógva fólkið.

Settúrslitini í dag tala fyri seg, og í fyrsta settið legði Fleyr seg á odda 12-3, áðrenn settið varð vunnið 25-8. Bæði í øðrum og triðja setti vann Fleyr seg upp á 7-0, áðrenn Dráttur yvirhøvur fekk stig.

Landskappingin hjá kvinnum, sum nú eitur Hotel Djurhuus-deildin, byrjar 22. september.