Í gjárkvøldið fekk Oyndarfjørður ongan lim í býráðið í Runavík. Elin Klein Joensen, sum var í býráðnum, stillaði ikki uppaftur. Oyndfirðingar stillaðu Jóhan Vest upp. Hann fekk 101 atkvøður og manglaði eina atkvøðu í at verða valdur.
Í dag hevur fínteljing verið. Eftir at tað var fíntalt stóð á jøvnum millum Jóhan Vest og Jonhard Danielsen, sum báðir fingu 101 atkvøður. Tá ið Jonhard Danielsen í gjárkvøldið var áttandi og síðst valdi býráðslimurin á lista A, var í dag neyðugt við lutakasti millum Jonhard Danielsen og Jóhan Vest, og tað lutakastið vann Jóhan Vest, sum nú er býráðslimur. Í gjárkvøldið var atkvøðutalið hjá Jonhard Danielsen 102, men í fínteljingini í dag var talið 101.
Jonhard Danielsen var valdur fyri fýra árum síðani. Nú hann ikki er býráðslimur, eru seks av ellivu býráðslimum í Runavíkar kommunu nýggir. Umframt Jóhan Vest eru teir Jógvan Andersen, Sigrun Jónsveinsdóttir, John Andersen, Arnfinn Langgaard og Bogi Hansen.
-Hetta vóru óvæntað boð at fáa, sigur Jóhan Vest.
Jóhan Vest var býráðslimur í valskeiðnum 2017 – 2020.
Hvat fert tú at raðfesta?
-At arbeiða fyri alla kommununa. Tá ið eg búgvi í Oyndarfirði, so hevði tað verið gott, um vit fingu betra um busssambandið, so børnini kundu fingið betri møguleika at ferðast til frítíðarvirksemið í kommununi.
Hvønn fert tú at peika á at vera borgarstjóri?
-Eg vóni, at talan verður um breitt samstarv, sum tað plagar at vera. Fólkið hevur talað, og úrslitið vísir greitt, at tað ikki er nøkur orsøk at skifta borgarstjóran út, sigur Jóhan Vest í Oyndafirði.
