Síðani norðmaðurin Steffen Landro 1. desember varð kunngjørdur at vera nýggjur venjari í 07 Vestur hevur ferðslan verið stór í felagnum. Fyrstu tíðina vóru tað spælarar, sum fóru úr felagnum, men nú gongur hin vegin.
Eftir at spælari, sum hevur verið í AC Horsens, skrivaði undir sáttmála við 07 Vestur, varð í gjár kunngjørt, at nigerianskur spælari, sum hevur verið í Norra, nú fer at spæla í 07 Vestur, og í dag er ein norðmaður lagstur aftrat.
07 Vestur skrivar soleiðis:
Normaðurin Filip Brattbakk hevur skrivað sáttmála við 07 Vestur. Tey fótbóltsáhugaðu kenna nokk eftirnavnið aftur. Filip er sonur Harald Martin Bratbakk, sum er kendur frá FCK, Rosenborg, Celtic og norska landsliðnum.
Filip hevur fingið væl at fótbóltsevnunum hjá pápanum. Hann hevur spælt ungdómsfótbólt við Rosenborg, og fekk sáttmála við Rosenborg í 2020. Hann bleiv nokkso skjótt útleigaður til Ranheim og fór til Raufoss eftir tað. Filip er skrásettur fyri 7 dystir í bestu deildini og 88 dystir í næstbestu deildini í Norra.
Filip spælir sum áleypari ella høgri vongur. Hann er øgiliga skjótur og øgiliga bólttryggur spælari.
Vit ynskja Filip vælkomnum í felagið, skrivar 07 Vestur.
Filip Brattbakk er føddur 24. apríl í 2000 og er harvið 23 ára gamal.
