Amerikanskir myndugleikar royna at finna útav, hvørt ein kvinna hevur stolið telduna hjá forkvinnuni í umboðsmannatinginum, Nancy Pelosi. Tað skrivar Reuters.
Samveldisløgreglan, FBI, eftirlýsir eina kvinnu, sum eftir øllum at døma royndi at stjala eina teldu hjá forkvinnuni undir ófriðinum á Capitol Hill tann 6. Januar við tí fyri eyga, at selja upplýsingar til russisku fregnartænasta.
Tað stendur at lesa í rættarskjølum, ið tíðindastovan AFP hevur fingið innlit í, sum FBI hevur latið til ein umdømisdómstól í Washington D.C.
Enn er óvist, hvar kvinnan – Riley June Williams – sum er úr Pennsylvania, er fyri tíðina. FBI hevur nú kunngjørt eini handtøkuboð eftir henni.
Her verður hon ákærd fyri at hava brotið sær veg inn í Kongressina, og fyri at hava tikið lut í ófriðinum, sum endaði við, at fleiri fólk, sum taka undir við og stuðla Donald Trump, trokaðu seg inn í Kongressina og endavendu fleiri kontórum harinni – teirra millum kontórið hjá forkvinnuni í umboðsmannatinginum, Nancy Pelosi.
Tað er fyrrverandi unnusti hjá Riley June Williams, ið boðaði FBI frá, at hon hevði ætlanir um at senda tóleindina í telduni til ein vin í Russlandi, ið so skuldi selja tóleindina víðari til russisku fregnartænastuna.
Dagføring: Kvinnan, ið var eftirlýst, hevur nú yvirgivið seg.
Williams er ikki ákærd fyri tjóvarí, men verður skuldsett fyri at hava tikið lut í ófriðinum á Capitol og Kongressini.
Her eru nýggjar upptøkur komnar undan kavi frá ófriðinum, tá fólk tóku seg inn í Kongressina:
