Tað eru færri nýggir bilar at síggja á vegnum kring landið higartil í ár aftur ímóti í fjør. Talið á nýggjum bilum vaks alsamt - og tað vaks nógv, men fyribils tølini í ár benda á, at nú er stígur komin í.
Ein uppgerð hjá Akstovuni vísir, at higartil í ár eru væl færri bilar seldir enn í sama tíðarskeiði í fjør.
Nógv størsta talið á bilum, sum verða seldir, eru persónbilar, og fyrsta ársfjórðing í ár, vórðu 320 nýggir persónbilar seldir í Føroyum. Tað eru 32 bilar færri enn í sama tíðarskeiði í fjør.
Hinvegin hava tey, sum innflyta brúktar bilar at selja í Føroyum, góðar dagar. Í fyrsta ársfjórðingi í fjør, vórðu bara 11 persónbilar innfluttir til at selja aftur í Føroyum, men í fyrsta ársfjórðingi í ár, er talið 119 brúktir bilar. Bara í mars í ár eru 63 brúktir persónbilar innfluttir til at selja, í mars í fjør var talið seks.
