Landsliðsvenjarin hjá Eysturríki, Franco Foda, var ikki heilt nøgdur við avrikið hjá sínum monnum í kvøld. Hann helt tó, at sigurin ongantíð var í vanda.
Á tíðindafundinum eftir dystin helt eysturríkski venjarin fyri, at liðið hjá sær gav ov nógvar møguleikar burtur í fyrra hálvleiki.
– Vit gjørdu tað ov lætt fyri føroyska liðið at koma til nakrar málmøguleikar í fyrra hálvleiki, og dugdu ov illa at verja móti høgu bóltunum. Men vit fingu tosa um hetta í hálvleikinum, og tað sá nógv betur út í seinna hálvleiki, sigur landsliðsvenjarin hjá Eysturríki, Franco Foda.
Hann helt tó, at hóast liðið hjá sær gav ov nógvar málmøguleikar burtur í fyrra hálvleiki, so var sigurin ongantíð í vanda.
– Vit stýrdu spælinum í seinna hálvleiki, og í seinna hálvleiki høvdu vit møguleikar at vinna við fleiri málum.
Eysturríksku tíðindafólkini vildu tó fáa at vita, hví eysturríkar gjørdu so nógvar feilir og góvu so nógvar møguleikar burtur.
– Jú, mínir leikarar gjørdu nakrar feilir, men tað var kanska graslíki, ið var orsøkin til tað. Bólturin hoppar eitt sindur øðrvísi á graslíki, var aftursvarið frá Franco Foda, landsliðsvenjara, sum eisini lovaði eysturríkum, at tílíkir feilir ikki fóru at verða gjørdir í Parkini týskvøldið.
Skal Eysturríki gera sær nakrar vónir at spæla seg víðari í HM-endaspælið komandi ár, so má liðið fáa eitt gott úrslit í Parkini.
Hinvegin kunnu føroyingar geva eysturríkum eina hjálpandi hond, megna føroyingar at vera meira avgjørdir móti skotum – fáa vit líka nógvar málmøguleikar, sum vit fingu í kvøld móti Eysturríki.
.png){kind=logo}
