Eyðvør skoraði fyri sjeyndu ferð á rað

Næstsíðsta umfar undan summarsteðginum var um vikuskiftið. KÍ vann stórsigur á heimavølli ímóti Víkingi, og NSÍ, sum er fremsti avbjóðarin í FM kappingini, tapti á útivølli ímóti HB. Tí eru tað nú 10 stig frá KÍ og aftur til NSÍ, sum er eitt stig frammanfyri HB.

Á jóansøku endaði tað 1-1  millum Suðringar og 07 Vestur, sum leingi vóru á odda. Í síðstu løtu javnaði Silja Augustinussen til 1-1, og Suðringar tvífaldaðu stigatalið til tvey.

HB hevði vitjan av NSÍ, sum noyddist til hús við 2-1 tapi. Rutt Gregersen legði eftir lítið korter NSÍ á odda. Hetta var annað málið hjá Rutt Gregersen í ár. Fimm minuttir seinni javnaði Sunniva Willemoes til 1-1. Hetta var fjórða málið hjá Sunniva Willemoes í ár. Tríggir minuttir restaðu, tá ið Fridrikka Clementsen skoraði HB sigursmálið. Fridrikka Clementsen hevur nú skorað fimm mál.

Í Klaksvík vann KÍ 5-0 ímóti Víkingi, og KÍ hevur eftir 12 umfør framvegis fulla úrtøku. Hálvleiksstøðan var 4-0. Rannvá B. Andreasen setti hol á. Hon er ikki so ofta longur millum tær fyrstu ellivu. Tað var hon í dag, og hon skoraði fyri triðju ferð í ár.

Eyðvør Klakstein økti um munin til 2-0. Eisini hon hevur nú skorað 12 mál í landskappingini. Hetta var sjeyndi dysturin á rað, at Eyðvør Klakstein var málskjútti, og hon hevur nú skorað 12 mál í 12 landskappingardystum og tilsaman 16 mál í 16 dystum, um steypadystirnir verða taldir við. Eyðvør tykist vera betri fyri, enn hon nakrantíð hevur verið, og tað man ikki vera langt frá, at hon er ársins spælari higartil í ár. Tóra Mohr, Tórun Højgaard Joensen og Birita Ryan skoraðu trý tey síðstu málini. Tóra Mohr hevur skorað sjey mál, Tórun Højgaard Joensen trý mál, og í dag skoraði miðverjin  og landsliðsspælarin Birita Ryan fyri fyrstu ferð í ár, tá ið eftir horna við høvdinum setti bóltin í málið.

Leygardagin hittast NSÍ og KÍ í Runavík.

HB – NSÍ 2-1 (1-1)

0-1: Rutt Gregersen

1-1: Sunniva Willemoes

2-1: Fridrikka Clementsen

TB/FCS/Royn – 07 Vestur 1-1 (0-0)

0-1: Lisa Haraldsen

1-1: Silja Augustinussen

KÍ – Víkingur 5-0 (4-0)

1-0: Rannvá B. Andreasen

2-0: Eyðvør Klakstein

3-0: Tóra Mohr

4-0: Tórun Højgaard Joensen br

5-0: Birita Ryan

EBS/Skála – B36 útsettur til 23. august

Leygardagin 1. juli

Víkingur – EBS/Skála

NSÍ – KÍ

B36 – 07 Vestur